بلدنا بتتقدم بينا شعار جامع مانع ساحق ماحق لايصد ولا يرد

--------------------------------------------------------------------------------





بلدنا بتتقدم بينا شعار جامع مانع ساحق ماحق لايصد ولا يرد
يختصر بداخله 26 عاما من الخير الوارف وارخاء الجارف والشفافيه والديموقراطيه والخطط التنمويه الأصلاحيه الأقتصاديه النوويه


بذمتك ودينك يا شيخ ...ياخى وحياه العيش والملح فى احسن من كده
انجازات اهى شغاله ...ميه اهى نضيفه وموجوده ... العيش بقى الرغيف بخمسين قرش يعنى ماكملش الجنيه ...البطاله بتنقص مش بتزيد ولا حاجه ... الشباب بتوعنا زى الف ومبسوطين وقاعدين فى البلد لابيروحو يغرقو فى اى حته ولا اي حاجه ولا طماعين ولا بيتحايلو على لقمه العيش شباب زى الورد ....وخطط التنميه على ودنه ثلاثيه وخمسيه وسداسيه –طويله الأجل وقصيره المدى ياراجل حتى النووى بعون الله هنبدأ فيه .... وكأس العالم طبقا لتوجيهات معالى بابا محمد حسنى مبارك ونجله الكريم جمال محمد حسنى مبارك هنتأهل له زى ما قال سمير زاهر ... من الأخر احنا بنعيش ازهى العصور ... بكل تصنيفات العيشه بقى ... زى ما تقول قول ... [اشى شفافيه] و[اشى ديموقراطيه] وكل حاجه بالصلاة على النبى ... وعلشان ازيدك من الشعر بيت ...خد عند الشعار ده كمان " بلدنا بتتقدم بينا " ياعينى على الثقه ... ياروحى على التمكن والقوه ... شعار يحمل نبره تقريريه واثقه – ساحقه ماحقه لا تصد ولا ترد كمان ....
طب مين اللى هيصد ومين اللى هيرد ؟ ويرد يقول ايه
اذا كان كل واحد بيتكلم عن البلد بتاعته يعنى اللى من الباجور واللى من اسكندريه كل واحد وبلده.... محدش جاب سيره مصر ...ولا يستطيع اى مكابر او حتى مصاغر ان ينكر ان كل بلد من البلاد بتاعت الناس الكبيره دى بتتقدم فعلا بيهم ومن غيرهم كمان.... لأنها اعتادت التقدم خلاص على مدى هذه السنين وارفه الخير ...جارفه الرخاء....والمسأله كلها ان ده شعار هذه المرحله كما يراه اولى الأمر والنهى ....فى الحزب الوطنى الذى كان شعاره فى مرحله اخرى سابقه حزب كل المصريين وهو شعار كان فيه شموليه اكتر من هذا الشعار بتاع بلدنا بتتقدم بينا وبتتقدم لفين تحديدا !!!


وانا لا استطيع ان اغض عين الحسد عن كريمه رجال السياسه فى مصر والذين يشرف بهم الحزب الوطنى
تخيل حضرتك حزب واحد فيه كل الرموز دى !!!!
كمال الشاذلى ...زكريا عزمى ... فتحى سرور.... صفوت الشريف... احمد عز... على الدين هلال
احنا من ساعه ما وعينا على الدنيا السياسيه
وما بنشوفش غير دول تقريبا... ولو اضفنا لهؤلاء الديناصورات السياسيين هذا الشاب الواعد المتوعد جمال مبارك ...سليل القصر الرئاسى وحامل خبرات الرعيل الأول من اصحاب الحنكه السياسيه على اعلى مستوى
بالله عليك يا مواطن ...منك له الا يجب علينا جميعا ان نفغر الفاه...ونرنو بالبصر وننصت كل السمع حينما يتفضل علينا الحزب الحاكم ...بأى نصح او ارشاد ...وطبقا لكل هذه الحيثيات ....
الا يجب ان نـتأمل مليا
فى اى شعار ينعم بيه علينا افاضل هذا الحزب ورجالاته ...من كريمه رجالات الوطن؟
ونحن فى مصر عموما نتمتع منذ امد بعيد بزخم جميل من الشعارات ذات الحيثيه ...فمنذ شعار امجاد ياعرب امجاد.... وما يخص القوميه العربيه وما الى ذلك ثم المرحله التاليه بتاعة السلام والمحادثات وشعار الأرض مقابل السلام... ثم وصلنا حاليا لمرحله الأصلاحات الأستراتيجيه والبناء الأقتصادى والسياسى والأجتماعى وهكذا كانت شعارات الحزب الوطنى الديموقراطى ...واخرها " بلدنا بتتقدم بينا "
واننى بكل حب واخلاص اتمنى ان يتواصل الحزب الوطنى مع كل اللى مش حزب وطنى بمعنى اننى مش وطنى... ومش اخوانى وبردو لا انتمى الى اى حزب معارض....لأنهم مش موجودين دلوقتى ولكننى انظر بكثير من الأعجاب لقدره وقوه الحزب الحاكم ورجالاته الأقوياء وممارسته الحزبيه ومؤتمراته الوطنيه ...وانا باتفرج على المؤتمر الاخير ... استلقيت على الأرض ضاحكا عندما تصورت ان حزب التجمع مثلا هو اللى عمل مؤتمر زى ده.... او مثلا حزب مصر عمل مؤتمر زى ده او حزب مصر 2000 مثلا ...لأختيار رئيس الحزب ولجانه الحزبيه ...يطلع واحد مغرض وحاقد ويقولك ايوه بس ايوه بس اصل الرئيس بتاع اى حزب من دول مهوش رئيس الجمهوريه ذات نفسه... والنظام والسيستم الذى يحكم عمل منظومه الحزب .... نرجع لأول الكلام...بذمتك ودينك يا شيخ ...والعيش والملح ....فيه احسن من كده ؟ وبلدنا بتتقد بينا ....هذا هو النظام والسيستم ... يا سيستم



وليد كساب
جريده الدستور المصريه

دى ضربه حره مباشره

لا تعليق

هههههههههههههههههههههههه

والتعليق اجمل

مشكور على المرور

مشكور
بارك الله فيك
دمت لنا
وجعلة فى ميزان حسانتك

nice ya reem

شكرا يا تازو
نورت